Një djalë 9-vjeçar është bërë fëmija i parë në Mbretërinë e Bashkuar që i është nënshtruar një ndërhyrjeje inovative për zgjatjen e këmbës, falë një teknike të re të aplikuar në Alder Hey Children’s Hospital, në Liverpool. Ndërhyrja shënon një hap të rëndësishëm në trajtimin e diferencave të gjatësisë së gjymtyrëve tek fëmijët.
9-vjeçari Alfie Phillips, nga Northampton, vuan nga fibular hemimelia, një sëmundje e rrallë që prek më pak se një në 40 mijë lindje dhe pengon zhvillimin normal të njërës këmbë. Në rastin e tij, këmba e djathtë ishte disa centimetra më e shkurtër se e majta, diferencë që pritej të rritej me kalimin e viteve.
Operacioni u krye në mars 2025 dhe përfshiu vendosjen e një gozhde teleskopike metalike brenda kockës së kofshës. Përmes një pajisjeje magnetike të përdorur disa herë në ditë, kocka u zgjat gradualisht rreth 1 milimetër në ditë, ndërsa organizmi krijonte ind të ri kockor në hapësirën e formuar.
Pas ndërhyrjes, i mituri ndoqi seanca të rregullta fizioterapie dhe kontrolle mjekësore për disa javë. Brenda pak muajsh, ai arriti të rifitonte lëvizshmërinë e plotë dhe sot mund të vrapojë, të luajë basketboll dhe të kryejë aktivitete që më parë i kishte të vështira.
Mjekët theksojnë se kjo metodë, e cila më parë aplikohej vetëm tek të rriturit, ofron më pak dhimbje dhe një përvojë më të mirë rikuperimi për fëmijët. Pas suksesit të parë, teknika është përdorur tashmë edhe tek tre pacientë të tjerë, ndërsa pritet të zgjerohet në qendra të tjera të specializuara në vend.
