Aktori turk, Can Yaman, do të jetë një nga bashkëprezantuesit e Festivalit të Sanremos 2026, eventi prestigjioz muzikor nga i cili do të përzgjidhet përfaqësuesi i Italisë në Eurovision 2026.
Lajmi është konfirmuar zyrtarisht nga televizioni publik italian RAI, i cili bëri të ditur se Yaman do të jetë në skenë në një prej pesë netëve të festivalit.
Sipas njoftimit, aktori do të prezantojë së bashku me drejtuesin kryesor Carlo Conti dhe këngëtaren e njohur italiane Laura Pausini në natën e parë të festivalit, e planifikuar të mbahet më 24 shkurt.
Festivali i Sanremos do të zhvillohet nga 24 deri më 28 shkurt dhe në të do të marrin pjesë gjithsej 30 artistë.
Ndër pjesëmarrësit është edhe këngëtari Ermal Meta me këngën “Stella stellina”. Meta kishte përfaqësuar më parë Italinë në Eurovision 2018 së bashku me Fabrizio Moron. Gjithashtu në garë do të jetë edhe këngëtari Raf me këngën “Ora e per sempre”, i cili kishte përfaqësuar Italinë në Eurovision 1987 së bashku me Umberto Tozzin.
Ashtu si në vitet e mëparshme, fituesi i Festivalit të Sanremos do të fitojë të drejtën për të përfaqësuar Italinë në Eurovision. Në rast se fituesi refuzon pjesëmarrjen, e drejta i kalon artistit të renditur në vendin e dytë dhe më pas kandidatëve të tjerë sipas klasifikimit përfundimtar.
Struktura e festivalit parashikon që në natën e parë të performojnë të gjithë artistët, ndërsa votimi do të kryhet nga juria e mediave. Netët e dyta dhe të treta do të ndajnë garuesit në dy grupe, me votim nga juritë e radiove dhe publiku.
Nata e katërt do t’i dedikohet interpretimeve të këngëve të njohura (cover) dhe nuk do të ndikojë në rezultatin përfundimtar.
Në natën e pestë dhe finale, të gjithë artistët do të rikthehen në skenë, ndërsa fituesi do të përcaktohet përmes kombinimit të televotimit, jurisë së mediave dhe asaj të radiove.
