Një incident me armë zjarri është raportuar pranë rezidencës së këngëtares së njohur Rihanna në Los Angeles, ku një grua rreth të 30-ave dyshohet se hapi zjarr drejt shtëpisë së artistes ndërsa ajo ndodhej brenda. Fatmirësisht, nuk raportohet për persona të lënduar.
Sipas informacioneve paraprake, e dyshuara ndaloi me automjetin e saj jashtë rezidencës dhe qëlloi disa herë drejt pronës. Një zyrtar policie konfirmoi për CBS News se në vendngjarje u gjetën gëzhoja të armëve automatike.
Policia tha se gruaja dyshohet se qëlloi shtatë herë përpara se të largohej me shpejtësi nga vendi i ngjarjes. Automjeti i saj u gjet rreth 12 kilometra larg shtëpisë së këngëtares, ku autoritetet arritën ta arrestonin. Identiteti i saj nuk është bërë ende publik.
Nuk dihet ende nëse partneri i Rihannës, reperi A$AP Rocky, dhe tre fëmijët e tyre – RZA, Riot dhe Rocky – ndodheshin në shtëpi në momentin e incidentit.
Pas ngjarjes, oficerët e Los Angeles Police Department bllokuan rrugën pranë rezidencës për të kryer hetimet. Mediat raportojnë se përfaqësuesit e artistes dhe autoritetet lokale nuk kanë dhënë ende një deklaratë zyrtare për detajet e plota të incidentit.
Rihanna, e lindur në Barbados, u bë e famshme në fillim të viteve 2000 me hite si Pon de Replay dhe Umbrella. Përveç karrierës muzikore, ajo ka ndërtuar një perandori biznesi, duke përfshirë markën e kozmetikës Fenty Beauty. Sipas Forbes, pasuria e saj neto vlerësohet në mbi një miliard dollarë.
